أمر الله خطاب جديد
حول تفريغ العبادات من مضمونها
الحج نموذجا!
بص يا سيدي فيه عبادة
المفروض إن فيها كل الناس لابسة ثوب واحد
(ثوب بسيط جدا يشترط أن لا مخيط فيه)
والمفترض فيه كمان
إنك مش تقص شعرك ولا ظوافرك
ومتغطيش راسك بعمامة أو طاقية
وممنوع من ممارسة الجنس أو ملاعبة النساء
وممنوع من الصيد ومن الكلام في الجنس (الرفث)
ومن الفسوق وحتى الجدال ممنوع!!
فالمفترض إنه شيء بديهي إنه يفهم من كده إن العبادة دي فيها “تجرد” من الدنيا وزينتها في الفترة دي، والاكتفاء بأقل قليل!
والإقبال على الله والإكثار من ذكره!
فتيجي تلاقي ناس بعد كده تقدم لك رفاهيات في الحج
اللي هو، آه الممنوعات اللي فوق دي مش هنخليك تعملها
إنما مش هنحسسك بأي مشقة، وهنوفر لك رفاهيات بحيث تحج بدون أي مشقة!
(قريبا هيعملوا سكوترز للحجاج يطوفوا عليها حوالين الكعبة ويسعوا بيها، من غير ما يمشوا ويتعبوا نفسهم، والعبرة بالطواف والسعي فليس هناك نص ملزم بأن يسير الإنسان على رجله)
(مرارتي!!!!!!!!)
يا جماعة باختصار وفي كلمتين علشان مش نطول مع بعض:
الحج شكل من أشكال “الرهبنة”/ العزلة
حاجة قصيرة كده بننخلع فيها من الدنيا
بس مش بسلبية … فيه أفعال بنتقرب بيها من ربنا
فلما حضرتك تحج
شوف انت بتنخلع ازاي
وانت فعلا بتعرف تنخلع وتنعزل
ولا شوية “رياضة” بتمارسها!!
والسلام
